Noia e Parrulo buscan a clasificación para a Copa no derbi do Mourís

O Noia Portus Apóstoli e o Parrulo Ferrol despedirán a primeira volta cun derbi galego que pode traer premio gordo. Os dous chegan a este partido coa salvación encarrilada e con opcións de xogar a Copa. Poucas para o Noia, que precisa gañar e que fallen dous rivais. Máis para os ferroláns, que se suman os tres puntos agardarían por un tropezo dun dos tres equipos que teñen por diante na táboa.

E con tanto en xogo haberá cheo absoluto e ambiente de gala no Pavillón Agustín Mourís. Será toda unha festa do fútbol sala galego.

O Noia e o Parrulo buscan un broche de ouro para pechar un ano moi exitoso para os dous equipos galegos da máxima categoría.