A festa da vedima do Saviñao rende homenaxe aos viños da Ribeira Sacra

A devesa de Escairón acubilla a festa da vendima, unha cita que exalta os traballos para a obtención do viño. Vai xa pola cuarta edición. O alcalde, Juan Carlos Armesto, explica que "había un oco, unha necesidade" de facer esta festa.

O pregoeiro do evento, o director da Axencia Galega de Calidade Alimentaria, Martín Alemparte, pola súa banda, indica que "a vendima é o tiro de saída ao recoñecemento dos viños que se fan na Ribeira Sacra".

As seis adegas asentadas no Saviñao participan neste evento no que tamén hai espazo para a artesanía e a gastronomía.

Leticia Estévez, unha adegueira deste concello, recoñece que "é un lugar onde podemos amosar os produtos da zona", mentres que unha vendedora de queixos matiza que "o viño é o máis importante desta feira".

Importante e decisorio para a configuración da paisaxe. Tal e como explica o adegueiro Juan Carlos Varela, o que fai singular este lugar "é o viñedo". Unha contorna que opta a ser recoñecida como patrimonio mundial.