Un "punto negro" viario na Estrada, incluido entre os tramos máis perigosos de Galicia
Os veciños levan denunciando o tramo, que atravesa o núcleo urbano do concello pontevedrés da Estrada
O traxecto está inzado de cruzamentos peonís e rexistra un tráfico denso
Automobilistas Europeos Asociados inclúen o tramo no informe de estradas máis perigosas de Galicia
A veciñanza e o concello da Estrada veñen denunciando en numerosas ocasións a perigosidade dun tramo da nacional 640. Unha vía que xunta Caldas de Reis con Lalín e que nun traxecto de algo máis dun quilómetro atravesa o núcleo urbano estradense.
"É perigoso porque é unha recta moi grande e todos os que veñen de arriba ás veces nin te dás conta de que está este cruzamento aquí. Xa non sei canta xente atropelaron", comenta unha viandante.
O traxecto, que se situa no punto quilómetrico 204, aparece cualificado de punto negro nun informe recente de Automobilistas Europeos Asociados. A partir de datos do Ministerio de Transporte está incluído dentro dos dezasete tramos máis perigosos de Galicia.
A proliferación de pasos de peóns xunto cunha alta densidade de tráfico converte esta travesía nun punto problemático para a circulación viaria.
"Moitos piden unha circunvalación á vila; outros que teña unha limitación de velocidade máis marcada, outros semáforos, como hai máis arriba; outros un paso elevado", ilustra unha veciña.
Segundo informe, que abrangue dende 2020 a 2024, neste traxecto producíronse once accidentes cunha ducia de vítimas, entre feridos e falecidos.
