Muxía estrea este verán unha casa flotante vacacional amarrada no peirao

En Galicia, con case 1.500 quilómetros de costa, non estamos aínda afeitos a ver casas flotantes no noso litoral. Un novo proxecto, na Costa da Morte, permite pasar uns días nunha vivenda turística flotante instalada no porto de Muxía. 

Aboiando no peirao está xa este Refuxio do Mar desde hai uns días. Rodeada polas ondas, cos veleiros como únicos veciños e terrazas privilexiadas desde as que ver o solpor en Muxía. Ten todas as comodidades que se poidan precisar para pasar unhas noites a bordo. 

"Alma Flotante ofrece unha estancia enriba do mar, algo que aquí non a había, e unha experiencia distinta. Está pensada para quen queira gozar deste espazo para parellas, un matrimonio cun fillo, porque ten unha cama grande e un sofá cama, e tres terrazas", describe Lucía Luaces, xestora de Alma Flotante

A idea xurdiu a partir de varias viaxes, pero a experiencia de Daniel no sector da construción naval facilitou o proceso. 

"É unha embarcación que pode navegar pola ría porque está matriculada, pero a idea é que estea aquí amarrada e os visitantes poidan gozar deste encanto que temos aquí. Foi xa axeitada ás medidas necesarias para que colla nunha praza de peirao flotante. Leva servizo de auga e luz e un monocasco de fibra de vidro", asegura Danel Carracedo, socio dos Astaleiros Fibramar de Laxe e promotor de Alma Flotante.

Xa abriron axenda nas principais plataformas de turismo vacacional e agardan que o proxecto se estenda a outros portos galegos.