Multiplícanse as iniciativas solidarias cos afectados polo lume

Os gandeiros que queiran colaborar coas explotacións afectadas polo lume poden dirixirse a calquera das 30 oficinas de Unións Agrarias. Desde elas, estase a canalizar a súa solidariedade co obxectivo de que a forraxe chegue de xeito organizado e gradual alí onde máis se precisa.

"Tratamos de racionalizar e optimizar os recursos dos que queren dar coas necesidades dos que os teñen que recibir para evitar o peche de centos de explotacións. O máis urxente é o alimento non so do gando vacún, tamén cómpre comida para o gando ovino, caprino e apícola, que tamén sufriu de cheo o lume. Pero tamén hai que artellar mecanismos de axuda no longo prazo", explica Félix Porto, vicesecretario xeral de Unións Agrarias. 

En coordinación coa Xunta xa están a repartir os primeiros tractores de comida no macizo central ourensán. Pero desde a organización fan un chamamento para seguir colaborando nos vindeiros meses, onde seguirá facendo falta moita axuda para que os gandeiros poidan chegar a recuperar o que lles roubou o lume.

"O lume queimou tamén peches, e afectou a pozos e bebeiros de gando extensivo, ou tamén quedaron illas verdes no medio do lume que vai haber que pechar".

Outro exemplo de solidariedade chega desde o Colexio de Rexistradores da Propiedade. Como fixeron coa DANA ou co volcán da Palma axudarán a que os donos das parcelas e das casas queimadas poidan demostrar que son os titulares das mesmas.

"Facilitamos a información das propiedades a través de notas simples gratuítas, para que poidan demostrar que son os donos a efectos de pedir axudas", explica María Núñez, decana do Colexio de Rexistradores da Propiedade en Galicia.

Para verificar que as propiedades se atopan na zona afectada polos incendios e pedir a nota simple, poden consultar seu xeoportal de emerxencias. Unha ferramenta que cruza os datos do rexistro cos do satélite Copernicus, para facilitar a tramitación de indemnizacións ou seguros.