Morre unha persoa durante un incendio agrícola en San Cristovo de Cea
O sinistro produciuse na parroquia de Oseira
Imaxe de arquivo
Unha persoa faleceu durante un incendio forestal ocorrido este mércores en Cea. O sinistro produciuse arredor das catro e media á beira da estrada OU-406, nunha zona de monte da parroquia de Oseira.
Un tractor que estaba rozando provocou accidentalmente un pequeno incendio agrícola. Unha persoa que estaba preto do lugar achegouse a axudar pero atopouse mal. Crese que puido ter un infarto. A vítima era un concelleiro de Cea.
En todo caso, o seu falecemento non tivo relación co lume.
Ata o punto desprazáronse os profesionais de Urxencias Sanitarias de Galicia-061, que mobilizaron o helicóptero medicalizado con base en Ourense, xa que unha persoa necesitaba asistencia sanitaria.
Unha vez no lugar, os profesionais sanitarios non puideron facer nada por lle salvar a vida á persoa falecida. No operativo tamén participou a Garda Civil e os voluntarios de Protección Civil.
🔴 #AXEGAInforma do falecemento dunha persoa durante un incendio nunha zona de monte en San Cristovo de Cea.
— 112 Galicia (@112Galicia) July 2, 2025
📍 Pobadura, parroquia de Oseira.
▶️ Malia os intentos dos profesionais sanitarios, nada puideron facer por salvarlle a vida.
🔗 https://t.co/wV6uqZJUon pic.twitter.com/JOgpI5jwtb
