Morre o piloto Jesús López tras un accidente na Subida de Taboadela

O piloto Jesús López morreu este domingo tras un grave accidente acontecido na Subida de Taboadela. Sucedeu ás 12:00 horas deste mediodía. 

Durante a proba, o piloto ourensán perdeu o control do seu vehículo, foise da vía e bateu fortemente contra o noiro dunha casa.  Tras o golpe o coche ardeu e quedou completamente calcinado. 

Perante o suceso dous espectadores quedaron feridos. A organización dispoñía de ambulancias e persoal sanitario no evento e foron trasladados ao hospital de Ourense.

O 061 Galicia enviou ao lugar un vehículo sanitario co seu equipo médico para atender a muller e a afillada do falecido.

EFE/Alan Pérez

Ata o lugar desprazáronse ademais efectivos de Bombeiros de San Cibrao das Viñas, GES do Pereiro de Aguiar, persoal sanitario e axentes da Garda Civil. 

Non se puido facer nada por salvarlle a vida. Jesús López faleceu no acto. O ourensán era un dos pilotos máis coñecidos e queridos do motor galego. 

A Federación Galega de Automobilismo suspendeu a proba. 

O rally de Ourense, pola súa banda, emitiu un comunicado no que lamenta a perda dun dos "nomes propios do automobilismo ourensán", ao que considera un "piloto incansable" que competeu en case todas as disciplinas do motor.

🔴 #AXEGAInforma dunha persoa falecida e dúas feridas en Taboadela

📍 Subida a Taboadela

➡️ Tratouse dunha saída de vía dun coche que participaba nunha proba deportiva.
➡️ O coche resultou totalmente calcinado

🔗 https://t.co/TSTMOG3ZoL pic.twitter.com/YK0mcDwZwB

— 112 Galicia (@112Galicia) August 23, 2026