Morre o escritor e xornalista Xosé Luís Rúa, unha das voces da Radio Galega das últimas décadas
Tiña 74 anos e unha longa traxectoria no mundo da literatura e do xornalismo que o fixo merecedor de numerosos premios
Xosé Luís Rúa, nunha entrevista en Televisión de Galicia
Consternación en Ourense e no mundo da comunicación pola morte do escritor xornalista Xosé Luís Rúa Núñez.
Tiña 74 anos e unha longa traxectoria no mundo da literatura e do xornalismo.
Nas últimas tres décadas foi a voz da Radio Galega en Ourense.
Con anterioridade traballou noutros medios escritos galegos, como La Voz de Galicia, Faro de Vigo, La Región ou a Axencia Efe.
Un labor que lle supuxo ser merecedor de varios premios. Entre outros, logrou en 1995 o VII Premio de Xornalismo Xosé Aurelio Carracedo, instituído pola Deputación Provincial de Ourense.
En canto aos premios literarios, en 1995 logrou o XVI Premio de Poesía Cidade de Ourense, instituído polo Concello de Ourense, polo seu poemario O lobo nos outeiros. Xosé Luís Rúa volvería gañar este premio no ano 2001 con Elexías do Camba.
Tamén conseguiu en 2001 o XIV Premio de Poesía Eusebio Lorenzo Baleirón, instituído polo Concello de Dodro. O traballo premiado foi o poemario O tránsito da auga.
Ademais foi condecorado coa Medalla de Ouro da Real Banda de Gaitas da Deputación de Ourense.
