As redes sociais de Meta Instagram e Facebook volven á normalidade tras fallos en diversos países
Dende as 15:30 deste venres presentan varios erros de carga, entre eles problemas para iniciar sesión
En Arxentina, os usuarios tamén informaron de erros, o mesmo que no Brasil, Colombia, Canadá, Italia ou Estados Unidos
REUTERS/Hollie Adams
As redes sociais de Meta Instagram e Facebook volveron pouco a pouco á normalidade despois de experimentar este venres fallos en diversos países, entre eles España.
Os usuarios comezaron a informar de incidencias pasadas as 13:30 horas GMT, sobre todo vinculadas ao inicio de sesión, segundo recolle Downdetector, servizo que a través da súa web segue o rastro dixital mundial.
A orixe do problema, que sumou miles de queixas presentadas por usuarios de diversos países, aínda non se coñece, pero os inconvenientes parecen ter remitido, segundo os informes recollidos no citado portal.
Andy Stone, portavoz de Meta, despois de comunicar que desde a compañía se estaba a traballar na solución dos fallos, escribiu na rede social X: "Estamos volvendo, aínda que pode que leve un pouco de tempo que todo volva completamente á normalidade".
Os picos máis altos de incidencias producíronse arredor das 13:45/14:00 horas GMT.
En España, segundo os informes dos usuarios, no caso de Instagram as queixas eleváronse a unhas 750 comunicacións e para Facebook o pico foi de aproximadamente 900 informes. Agora en ambas as redes os rexistros dos usuarios son testemuñais.
Whatsapp tamén rexistrou algunhas incidencias a nivel mundial, pero as comunicacións dos usuarios foron reducidas, segundo a monitorización de Downdetector.
