O temporal golpea España, con fortes ventos en Cataluña e nas Baleares

O temporal de vento extremo que azouta este xoves Cataluña deixou, polo momento, 86 persoas feridas, cinco delas en estado grave, máis dun centenar de voos cancelados no aeroporto de Barcelona e múltiples afectacións en trens e estradas.

Cataluña amenceu coas escolas, universidades e centros deportivos pechados, coa atención sanitaria non urxente cancelada. 

Desde as primeiras horas da noite, o vento está varrendo canto atopa por diante na área metropolitana de Barcelona. O servizo catalán de meteoroloxía cualificouno no nivel máximo, seis sobre seis, e constatou refachos de ata 167 quilómetros por hora. Á media mañá en emerxencias xa tiñan un rexistro excepcional de incidencias.

"De momento levamos máis de 1.600 chamadas ao teléfono 112".

A maioría eran por derrubas de árbores, coma a dunha palmeira de Mataró que caeu sobre un coche que circulaba pola nacional II. A condutora resultou ferida, igual ca catro voluntarios de Protección Civil que estaban retirando outras árbores caídas en Sant Boi e o traballador dunha obra ao que lle caeu un muro enriba. 

A rede de transportes tamén está moi afectada. Na A-7 tentan resolver o embolsamento de camións. Esta mañá intentaban ir evacuando pouco a pouco os centos de tráilers paralizados. No aeroporto de Barcelona canceláronse máis de 90 voos e 10 tiveron que ser desviados porque os refachos de máis de 90 quilómetros por hora impedían a aterraxe. Tamén se suspendeu durante horas o AVE entre Barcelona e Tarragona, e agraváronse os problemas na rede de Rodalies.  

O vento afecta ademais o tráfico marítimo. Boa parte da costa catalá está tamén en aviso laranxa por vento en ondas, igual ca no litoral das Baleares e toda a costa do norte da Península, agás a de Euskadi que está en vermello. 

Afúndese parte da CC-428 entre Berzocana e Logrosán cun vehículo atrapado

 A estrada CC-428, no tramo que une as localidades cacereñas de Berzocana e Logrosán, permanece cortada ao tráfico tras producirse un desprendemento da calzada no punto quilométrico 7,500 que causou unha gran focha no que caeu un vehículo. O suceso ocorreu sobre as 7:25 horas deste xoves por causas que se están investigando. Segundo a Deputación de Cáceres, o esvaramento dun noiro arrastrou uns 30 metros de calzada.

A súa ocupante, unha muller, foi rescatada coa intervención de bombeiros do parque do SEPEI de Trujillo e trasladada a un centro sanitario para recibir atención médica.

Un desprendemento obriga a cortar a A-66 na provincia de Cáceres

A autovía A-66 permanece cortada ao tráfico no norte da provincia de Cáceres, en sentido Sevilla, entre os quilómetros 427 e 436, tras rexistrarse ás 16:40 horas un desprendemento de rocas e terra debido ás inclemencias meteorolóxicas, segundo informou a Garda Civil este xoves.

O corte, que se sitúa en torno ao quilómetro 431,5, foi solicitado e executado polo servizo de mantemento de estradas e atópase debidamente sinalizado.

Foi habilitado un desvío pola N-630 á altura de Baños de Montemayor e reincorporación á autovía en Aldeanueva del Camino, na provincia de Cáceres.