Mingueza: “Seguro que pelexaremos polos postos europeos”

O defensa Óscar Mingueza, unha das fichaxes estivais do Celta de Vigo, considera que o seu novo equipo ten persoal para pelexar por unha das prazas europeas.

“Ao final pasan moitas cousas na liga e non só depende da calidade do equipo. O ano pasado, o Barcelona tiña moi bo equipo e houbo momentos nos que estabamos moi abaixo na táboa. Depende de moitas cousas, dos refachos do equipo e de como estean os rivais, pero eu creo que podemos estar na táboa por arriba. Seguro que pelexaremos por postos de Europa”, indicou.

Mingueza ofreceuse ao técnico Eduardo Coudet tanto para xogar “de lateral como de central”, e eloxiou ao que será o seu novo compañeiro Carles Pérez, ao que coñece da súa etapa no Barcelona.

“Coincidimos en xuvenís e no Barçelona B. Fun falando con el e díxome que xurdiran algúns problemas que non eran pola súa banda, porque el quería vir e o Celta tamén o quería traer. Seguro que nos pode achegar cousas moi boas. Ten características que, tal e como xogamos, nos poden axudar moitísimo”, comentou.

Esa ilusión que lle trasladou o exfutbolista do Roma tamén a ten Mingueza: “Tiña moitas ganas de vir ao Celta. Cando escoitei que había a opción do Celta, tiven poucas dúbidas de que quería vir aquí. É un club que sempre me gustou como xoga e encima falábanme moi ben do míster, que tiña as ideas moi claras e que era bo adestrador”.

Neste sentido, apuntou que o adestrador arxentino ten “as cousas moi claras” e que a maioría dos seus compañeiros teñen “os conceptos e os automatismos ben collidos", por iso confía en que os novos se adapten canto antes.