Milleiros de persoas apoian aos bombeiros tras o incendio mortal de Ferrol
A concentración serviu para "esixir o que nos merecemos, que se poñan os medios para que isto non se volva a repetir xamais", din os convocantes
O Concello de Ferrol íncluiu 40 prazas de bombeiros na súa oferta pública de emprego
EFE/Kiko Delgado
Milleiros de persoas concentráronse este xoves na praza de Armas de Ferrol en resposta a unha convocatoria do colectivo de bombeiros da cidade, que se celebrou unha semana despois do incendio que causou nunha vivenda de Recimil un morto e tres feridos graves, entre eles un efectivo contraincendios.
A protesta desenvolveuse minutos antes do pleno ordinario do Concello de Ferrol, cunha moción conxunta de toda a oposición que pide a depuración de responsabilidades polo suceso e melloras laborais para o persoal, que reclama un aumento de traballadores.
O acto comezou cun minuto de silencio polo falecido, Diego Gabarre, e a intervención do portavoz dos empregados municipais, Julián Vizoso, foi interrompida en varias ocasións por aplausos do público, entre o que figuraban edís da corporación ferrolá ou bombeiros doutras localidades de Galicia.
Baixo o lema "Todos somos Polo", coreado polos participantes en alusión ao bombeiro ferido, que sufriu a amputación dunha das súas pernas tras o incendio, a concentración serviu para "esixir o que nos merecemos, que se poñan os medios para que isto non se volva a repetir xamais", dixo Vizoso.
40 novas prazas de bombeiros
O Concello de Ferrol afirma que aprobou a maior oferta pública de emprego da súa historia, con 97 prazas. Entre elas figuran precisamente 40 para o corpo de bombeiros: seis de novo ingreso e 34 de promoción interna, que permitirán aos efectivos actuais reforzar o cadro de persoal e mellorar as condicións de traballo, segundo o concello.
