A acusación do accidente mortal do Saltamontes en Vigo di que "se botan a culpa uns a outros"

Unha das acusacións do procedemento xudicial aberto polo accidente mortal do Saltamontes, ocorrido nas festas de Matamá, en Vigo, en agosto de 2024, lamentou que as persoas investigadas "bótanse a culpa uns a outras", pero non quedou claro por que esa atracción estaba a funcionar cando carecía de autorización municipal. 

Así o manifestou ás portas da Cidade da Xustiza viguesa Francisco Méndez Senlle, o avogado da parella da vítima mortal, Iván Castaño de 36 anos, despois de asistir á declaración, como investigado, do xefe da Policía Local de Vigo, Alberto Carballo.

Máis explicacións sobre o correo electrónico 

O letrado, que non quixo desvelar detalles da declaración, manifestou que "quedan dilixencias por practicar" e que pensan pedir máis explicacións sobre o polémico correo electrónico remitido desde a Concellería de Seguridade á Policía Local, informando de que esa atracción non dispoñía de autorización, ao non cumprimentar toda a documentación. Trataríase dun correo, que segundo recolle un informe que se remitiu ao xulgado, quedou sen ler cando se enviou.

Méndez Senlle manifestou que "dá a sensación ás veces de que uns botan as culpas aos outros e nós como prexudicados, a miña clienta como prexudicada, quere unha explicación, necesita saber por que unha atracción que non podería funcionar se permitiu que se puxese en marcha, e non temos a explicación aínda".

Pedirán máis comparecencias de testemuñas nos xulgados 

O avogado da acusación confirmou tamén que pedirá que comparezan máis testemuñas, como axentes da Policía Local  e engadiu que a declaración deste xoves serviría para corroborar que "a Policía Local fai o seu traballo, e parece ser que o fai ben".

O avogado insistiu en que representa unha cidadá que foi a unha festa e que "estivo a piques de falecer", porque ía á beira da vítima. Manifestou tamén que os investigados poden manter a estratexia de defensa que desexen, pero, no caso de responsables políticos, como o da concelleira de Seguridade,  teñen que asumir unha "responsabilidade política" e "explicar aos cidadáns por que as cousas non funcionan ben, e acaban nunha morte nunha festa".

Por este caso están investigados a concelleira de Seguridade, Patricia Rodríguez; o xefe da área de Seguridade e Mobilidade municipal, Antonio Viveiro; o xefe da Policía Local de Vigo, Alberto Carballo; o propietario da atracción; o presidente da comisión de festas de Matamá, Cristian González, a entidade veciñal, así como o perito que realizou a inspección da atracción.