Medidas de prevención dos roubos en vivenda sen moradores por vacacións

A posta en práctica de hábitos seguros para evitar roubos no fogar, como pechar portas con chave e non deixar ventás abertas ao saír dela, debe ser unha constante cotiá, sobre todo nos casos en que a ausencia é por varios días.

Sabendo que o ladrón sempre buscará o momento cando non vai haber ninguén na vivenda, cómpre non deixar evidencias de que a casa queda baleira. 

Nas redes tamén é importante non amosar a nosa ausencia, pois os ladróns poderían ternos vixiados tamén por esas vías. Así fala disto o sarxento da Policía Xudicial na área de patrimonio Jose Luis Saavedra López.

"O sistema de peche, deixalo accionado sempre, deixar indicios de que na casa hai moradores, e nas redes sociais é moi importante todo o ano", afirma Saavedra López.

Pero non só os donos do domicilio son os que poden previr isto, pois a acción preventiva tamén pode vir de veciños da comunidade e de quen se encarga de tarefas como a limpeza das escaleiras.

"Por exemplo, que cando recolla ou enrole a alfombra ou o felpudo para fregar, que logo o volva poñer na posición normal, e non abrirlle a porta a alguén alleo ao inmoble", explica o sarxento Saavedra.

E se cando volve ao fogar observa que puido sufrir un roubo, Garda Civil e policía recomendan non destruír probas e chamalos de inmediato.

Tamén nos casos en que se observe unha clara manipulación dos obxectos, cando o mellor é non manipular nada.

Outros consellos para ter en conta poden ser ter unha persoa de confianza encargada de retirar o correo e visitar a vivenda.