Médicos instan a Administración a facer un cambio de modelo na atención primaria

"A medicina de familia non é atractiva para os residentes e para os estudantes de medicina porque a situación do día a día da atención primaria é complicada".

Así o expresa José Luis Jiménez, que durante oito anos presidiu o Colexio de Médicos de Ourense, do que hoxe é vicepresidente.

"Non o é (atractiva) e moitas enquisas nolo din, porque a súa situación no día a día
é difícil, complicada, con moito traballo e con moita dificultade para desenvolver o que teñen aprendido nunha consulta do día a día", di José Luis Jiménez.

Jiménez insta a Administración a desenvolver un cambio de modelo na atención primaria.

"Por suposto reforzala, darlle valor e facer un cambio de modelo, un cambio retributivo. Estamos nun momento complicado e a cidadanía ten que saber que a sanidade pública en Galicia, en España e mesmo en Europa, a sanidade pública tal e como a entendemos está en crise e en dificultade e os cidadáns deben sabelo"

Os profesionais médicos esixen a toma de decisións difíciles por parte das Administracións nos vindeiros meses para levar a cabo unha reestruturación do sistema de atención aos pacientes.

"E por tanto tócalle á Administración ser valente e tomar decisións de reorganización. Facela máis atractiva retributivamente, curricularmente. Facer itinerarios profesionais que permitan sen a rixidez administrativa que ten actualmente a sanidade pública", engade José Luis Jiménez, da Sociedade Galega de Medicina Interna.

E insiste en que eses cambios teñen que basearse, non só en atender pacientes numericamente, senón de facelo con resolución e con calidade.

"Creo que a medicina de familia está no branco, no centro do problema porque é a máis exposta e por tanto hai que facela atractiva, porque o é, o que hai que facer é permitir recuperar a súa esencia e a necesidade que temos dela como vertebradora do sistema"