Mariscadores da ría do Burgo piden axudas mentres non poidan traballar: "Que non nos deixen tirados"
Mariscadores da ría do Burgo piden axudas mentres non poidan traballar: "Que non nos deixen tirados"
Concentráronse para pedir unha solución para unha situación que afecta a case 70 persoas
A Delegación do Goberno traslada a súa "intención de colaborar nas axudas" co 50 % e pide a implicación da Xunta

Mariscadores e mariscadoras da ría do Burgo secundaron este luns unha nova concentración para esixir ao Goberno central e á Xunta axudas mentres non poidan traballar tras as obras de dragaxe.
"Que non nos deixen tirados na rúa", resumiu o portavoz do colectivo, Manuel Baldomir, ao trasladar a situación en que, segundo precisou, se atopan unhas 70 persoas. Con motivo dunha nova protesta, nesta ocasión fronte a Delegación do Goberno, pediu que lles dean unha "solución".
Neste sentido, cuestionou que por parte do Goberno central se garanta unha achega para reparar os danos no paseo marítimo de Culleredo tras as obras, o que, ao seu xuízo, debería facer "a empresa ou a aseguradora", e non para as axudas que o colectivo reclama.
"Que Xunta e Goberno se poñan de acordo, son case 70 postos en perigo por non poder realizar este traballo e non ter sustento económico para manter a licenza de marisqueo", insistiu Baldomir, que emprazou ás administracións a unha reunión este mércores na sede da Confraría de Pescadores.
Mentres, desde a Delegación do Goberno aseguraron que durante o paro da actividade o Executivo "financiou en solitario axudas aos mariscadores por valor de 3,8 millóns". Tamén traslada "a intención de colaborar nas axudas que sexan necesarias e chegando ao 50 % do total". "A Xunta tense que implicar", conclúe.