Unha moción de censura fai a Mariola Sampedro, do PPdeG, nova alcaldesa de Ribeira
Chega á alcaldía cos votos a favor do Partido Popular e o apoio de tres concelleiros do Partido Barbanza Independente (PBBI), que en 2023 favorecera a alcaldía do BNG
O pleno da moción de censura en Ribeira xa se prevía duro e arrancou con berros. A nova alcaldesa, Mariola Sampedro, defendía a lexitimidade do Partido Popular para lograr o goberno municipal.
Para conseguir de novo a alcaldía, o PP precisou o apoio do Partido Barbanza Independente, que naceu dunha escisión dos populares e que nas últimas eleccións municipais acadara 5 concelleiros.
Catro asinaron a proposta de moción de censura e un pasou a ser concelleiro non adscrito. Outra das concelleiras que asinara botouse atrás e tampouco apoiou a moción no pleno.
Nas eleccións de 2023, o Partido Barbanza Independente apoiara o BNG para nomear alcalde a Luís Pérez e entraron no goberno. Os dous concelleiros non adscritos, o PSOE e o BNG puxeron en dúbida os motivos do cambio de apoio.
A alcaldesa foi nomeada cos 10 votos do PP e 3 de Barbanza Independente nunha sesión onde a policía tivo que intervir varias veces para pedir silencio.
