Aumenta a tensión en Venezuela polas ameazas norteamericanas
A líder opositora, María Corina Machado, asegura que recollerá o Nobel da Paz o próximo mércores
Son imaxes das protestas que os opositores venezolanos en cidades coma Bos Aires, Bogotá ou Madrid, fixeron para apoiar á súa líder, María Corina Machado, que a semana que ven ten previsto recoller o premio Nobel da Paz. Os opositores denunciaron tamén a recente morte no cárcere do ex gobernador e dirixente antichavista Alfredo Díaz.
"Imos honrar a todas as vítimas, a todos os que sacrificaron a súa existencia, como Alfredito Díaz, que hoxe representa a todo ese martiriloxio", dixo en Madrid o dirixente opositor Antonio Ledezma.
Mentres, no interior de Venezuela aumenta a tensión polas ameazas de intervención, aérea ou terrestre, realizadas polo presidente norteamericano, Donald Trump, e cualificadas de ilegais polo presidente Nicolás Maduro.
"Venezuela non foi, non é nin será nunca, unha ameaza para os Estados Unidos de Norteamérica, ao contrario, Venezuela non é ameaza, é garantía de seguridade", sinalou Nicolás Maduro.
Desde a clandestinidade na que vive en Venezuela, a principal dirixente opositora ao chavismo, María Corina Machado, aseguroulles aos organizadores dos Premios Nobel que o próximo mércores, día dez, estará en Oslo, a capital norueguesa, para recoller o seu premio Nobel da Paz.
