María Reigosa marcha do grupo socialista de Lugo e deixa o goberno municipal en minoría

María Reigosa, concelleira de Lugo, comunicou este luns a súa decisión de abandonar o Goberno local. Renuncia e pasa a ser edil non adscrita. Reigosa, concelleira desde outubro do ano pasado, confirmou deste xeito a súa ruptura total co goberno municipal, tras dimitir o pasado mes de decembro as súas funcións como responsable local de Medio Rural e, posteriormente, apartarse das filas socialistas.

Reigosa continuaba formando parte do grupo municipal socialista pero, coa decisión deste luns, confirma unha ruptura que xa se escenificara en varios plenos, nos que a concelleira votou algúns asuntos co Partido Popular. 

Reigosa sinalou que se trata dunha "decisión meditada, adoptada tras as discrepancias sostidas na forma de entender e desenvolver o labor municipal" e desde a "convicción" de que, na situación actual, debe exercer a súa responsabilidade "con plena coherencia, independencia de criterio e lealdade ao interese xeral".

"Seguirá desempeñando a miña función con seriedade, respecto institucional e compromiso cos veciños e veciñas de Lugo", trasladou a concelleira.

María Reigosa, funcionaria e enxeñeira de Camiños no Ministerio para a Transición Ecolóxica, asumiu o seu cargo o pasado novembro tras o falecemento do socialista Pablo Permuy. A súa aterraxe non foi tranquila: en decembro dimitira das súas responsabilidades na área de Medio Rural, alegando “incompatibilidades” coa súa actividade profesional en Costas, pero seguía formando parte do grupo municipal.

A situación agravouse en xaneiro, cando decidiu causar baixa no PSOE, apenas dous meses e medio despois da súa chegada ao Goberno municipal de Lugo. Fíxoo sen renunciar á súa acta, apelando á coherencia persoal e ao seu “desencanto” coa xestión interna do grupo socialista.

Reigosa continuou ata agora formando parte do grupo municipal do PSOE, pero en calidade de concelleira independente. Con esta nova situación o Goberno do concello, bipartito formado por PSdeG e BNG queda en minoría, con 12 concelleiros, os mesmos que o PP. O voto de Reigosa será, a partir de agora, decisivo na gobernabilidade.

Unha situación paralela á que PSOE e BNG afrontan na Deputación de Lugo, onde tras apartarse das filas socialistas pola denuncia contra el por presunto acoso sexual, o expresidente socialista José Tomé e agora non adscrito mantense como clave para a gobernabilidade da institución provincial.