Un expolicía mata máis de 30 persoas nunha gardería de Tailandia
O exoficial, de 34 anos, suicidouse tras o ataque
Entre as vítimas hai 22 nenos e hai numerosos feridos
Un expolicía matou este xoves cun rifle 34 persoas, entre elas 22 nenos, nunha gardería da localidade de Uthai Sawan, no nordés de Tailandia, informou a policía.
O último comunicado da Policía sobre o suceso ocorrido ao redor do medio día, hora local, informou ademais de 15 feridos, oito deles en estado grave.
O sospeitoso, de 34 anos e que foi apartado do corpo por posesión de drogas, suicidouse tras o ataque. "Confirmamos que o criminal se disparou a si mesmo e morreu", apuntou a policía nun comunicado, mentres que os servizos de rescate detallaron que antes de quitarse a vida tamén matou a súa muller e o seu fillo.
O presunto asaltante disparou cun rifle automático aos presentes nunha escola infantil, que xeralmente acolle a nenos de entre 2 e 5 anos, antes de darse á fuga nunha furgoneta.
A maioría dos feridos foron trasladados ao hospital, que solicitou "con urxencia" que os cidadáns doen sangue de todos os tipos, segundo medios locais.
O primeiro ministro do país, Prayut Chan-ocha, expresou as súas condolencias ás familias.
