Máis de 15.000 familias, prexudicadas en Galicia polo ruído do ocio nocturno
Tres asociacións de veciños poñen en marcha a Federación Galega contra a Contaminación Acústica e invitan a todas a integrarse nela
Fonseca, de Santiago, Cimborrio, de Ourense, e Orzán Pescadería, da Coruña, son as asociacións de veciños impulsoras da Plataforma Galega contra a Contaminación Acústica. Acabar co ruído ocasionado polo ocio nocturno é o seu principal obxectivo, polos prexuízos que ocasiona no descanso e benestar de quen o sofren desde as súas vivendas.
Carlos Vence Lago, presidente da Federación Galega contra a Contaminación Acústica, di que
"detectamos que temos preto de 15.000 familias afectadas. Hai un montón de zonas de onde a xente ten que marchar. Estamos a falar de 15 familias, de momento".
Faltan datos dalgunhas localidades. A vida deses miles de persoas está alterada polo ruído que lles chega da rúa ou de locais de ocio que non cumpren a normativa e que están abertos toda a madrugada. Instan os gobernantes a que obriguen ao cumprimento da normativa.
"Os problemas que ocasiona a contaminación acústica afectan a saúde dos veciños e o dereito ao descanso. Tamén supón unha violación do domicilio, e por aí non podemos pasar", destaca Roberto Almuíña Díaz, tesoureiro da Federación Galega contra a Contaminación Acústica.
Chaman a que se integren nela máis asociacións veciñais para acabar coa agresión que o ruído en horas de descanso ocasiona no desenvolvemento vital de tantas persoas.
"Que saiban os políticos que hai miles de persoas padecendo problemas de saúde polo ruído que xera o ocio nocturno", afirma José Luis Méndez Campos, vicepresidente da nova federación.
Unha das medidas que consideran necesarias é que a Xunta modifique o decreto de horarios de ocio nocturno e os obrigue a pechar antes de luns a xoves.
