Máis de 1.200 novas prazas para a sanidade pública galega

O conselleiro de Sanidade, Antonio Gómez Caamaño, precisou este martes que o seu departamento dedicará nas contas de 2026 uns corenta millóns de euros á creación e consolidación de ata 1.244 prazas de persoal en distintos ámbitos do sistema sanitario.

Deste xeito, o gasto en persoal da Consellería de Sanidade ascenderá o próximo exercicio ata os 2.460 millóns de euros, un 2,7 % máis que este ano; un incremento motivado en gran medida pola estabilización de ata 789 profesionais, que requirirá de 26,7 millóns.

Entre as prazas que se crearán, Gómez Caamaño citou 77 postos en puntos de atención continuada (PAC), ou 23 para médicos de urxencias e asignacións en destinos como o novo Centro de Protonterapia de Galicia, na rede de psicólogos clínicos de primaria ou na Fundación de Urxencias Sanitarias de Galicia-061.

Consolídase desta maneira o capítulo de persoal como o principal investimento da Consellería, que en 2026 dispoñerá dun total de 5.671 millóns de euros, o maior de todos os departamentos do Goberno galego, tras un crecemento do 3,9 %, superior ao da media de aumento do orzamento

Repartido este montante por niveis asistenciais, a atención hospitalaria acapara ata 3.598 millóns de euros, un 3,4 % máis que en 2025; mentres que a atención primaria presenta un maior incremento en termos porcentuais, un 4,7 %, e alcanza os 1.747 millóns.

Gómez Caamaño, durante a súa comparecencia en comisión parlamentaria para presentar estas contas, destacou que tamén se incrementan notablemente as partidas para formación de especialistas sanitarios, un 11,5 % ata os 94,2 millóns, e para a investigación sanitaria, que alcanza os 31 millóns de euros tras aumentar a súa dotación en máis dun terzo.

60 millóns para centros de saúde e 210 para hospitais

Para a construción e renovación de infraestruturas sanitarias, haberá, no ámbito da atención primaria, uns 60 millóns que servirán para a entrada en servizo do CIS Olimpia Valencia de Vigo, avanzar en novos centros de saúde en Ourense, O Carballiño, Carballo e Cangas do Morrazo e intervencións menores en varios outros.

A cifra de investimento elévase a 210 millóns para obras e equipamento de hospitais, coas principais partidas previstas para o remate do Novo Montecelo, en Pontevedra; o impulso do novo Complexo Hospitalario Universitario da Coruña (CHUAC) e reformas e ampliacións en Ferrol, Ourense e Santiago de Compostela.

Ao longo da súa intervención, Gómez Caamaño repasou outras actuacións para 2026, como novos plans galegos de coidados paliativos e saúde mental, a renovación do transporte sanitario urxente, programas de cribado ou reformas lexislativas.

A oposición xulga insuficientes as contías

O proxecto de orzamentos presentado pola Xunta para Sanidade non atopou o aval dos grupos da oposición, que expresaron a súa desconformidade co mesmo e con algunhas das políticas postas en marcha desde o Executivo autonómico.

A deputada do BNG Montse Prado sentenciou que "estes números non dan para cambiar ningunha situación", dado que o incremento do gasto dedicado a persoal "non daría nin para cubrir o aumento salarial" previsto para o próximo exercicio.

Ademais, cuestionou as cifras consignadas para atención primaria, moi inferiores -criticou- ás incluídas nos últimos orzamentos elaborados polo Executivo de coalición entre PSdeG e BNG para o ano 2009.

Pola súa banda, a parlamentaria socialista Elena Espinosa considerou que estes orzamentos "mesturan os desexos coa realidade" e marcan unha serie de "deberes" que son "imposibles de cumprir" con estas contas.

Así, referiu que hai programas "infravalorados" e, en especial, botou en falta "políticas reais, con recursos humanos e orzamentarios suficientes" para atallar a "emerxencia silenciosa" no ámbito da saúde mental que, na súa opinión, está a vivirse en Galicia mentres a Xunta está "a mirar para outro lado".

O deputado do grupo mixto, Armando Ojea, tamén tomou a palabra durante esta comisión para reprochar a falta de investimentos sanitarios na provincia de Ourense.