Macron seguirá a recomendación de Lecornu e nomeará un novo primeiro ministro en 48 horas

O presidente francés, Emmanuel Macron, nomeará un novo primeiro ministro nas próximas 48 horas, seguindo a recomendación do xefe de Goberno saínte.

 Sébastien Lecornu trasladoulle na tarde deste mércores as conclusións das súas negociacións para lograr pactos políticos que dean estabilidade ao país, segundo informaron fontes do Palacio do Elíseo.

As mesmas fontes explicaron que Macron “tomou nota” das conclusións de Lecornu, quen asegurou que existe unha maioría de deputados contraria a un adianto electoral e posibilidades reais de aprobar os orzamentos de 2026 antes de final de ano.

O presidente ten previsto presidir o xoves pola tarde a cerimonia de entrada do xurista e exministro Robert Badinter no Panteón, en recoñecemento ao seu papel na abolición da pena de morte en 1981. O prazo de 48 horas para o nomeamento do novo primeiro ministro remataría, así, na noite do venres.

Lecornu descarta continuar e pide un relevo inmediato

Nunha entrevista na televisión pública France 2, Lecornu afirmou que existe marxe para acordos parlamentarios, pero descartou seguir á fronte do Executivo e instou Macron a nomear un sucesor nun prazo de dous días.

Tras dous días de consultas con todos os grupos moderados, concluíu que hai consenso sobre a urxencia de aprobar o orzamento de 2026 e vontade de chegar a compromisos.

“Temos unha Asemblea Nacional fragmentada con posibilidades de acordo. A maioría oponse ao adianto das lexislativas non por medo, senón porque o resultado sería similar e manteríase o bloqueo”, explicou Lecornu na entrevista.

O primeiro ministro en funcións acudiu ao Elíseo pouco antes para expor a Macron as conclusións dos contactos. “Recomendeille ao presidente que nomee un primeiro ministro en 48 horas. A miña misión rematou”, afirmou, descartando prolongar o seu mandato e negándose a especular sobre o nome do substituto: “Iso correspóndelle ao presidente, pero debería ser alguén sen ambicións presidenciais”.

Lecornu avanzou que, se Macron segue o seu consello, recibirá nos próximos días os líderes políticos para “pechar as últimas negociacións” e “avaliar a correlación de forzas” antes de escoller o novo xefe de Goberno.

Hipótese dun perfil de esquerdas

Nas últimas horas cobrou forza a posibilidade de que, tras nomear tres primeiros ministros procedentes da dereita e do centro, Macron opte por unha figura da esquerda, como lle reclaman socialistas, comunistas e ecoloxistas.

Segundo Lecornu, a prioridade debe ser a aprobación do orzamento de 2026, do que depende “a credibilidade de Francia e o benestar dos cidadáns”.