Lugo vai pasar do inverno ao verán en catro días

O mes de maio está a deixar moitos contrastes en canto ao tempo. Un exemplo témolo esta semana en Lugo, hoxe o ambiente pedía unha chaqueta; pola contra, o xoves espérase acadar os 30 graos. Uns cambios que antes non eran tan esaxerados.

"Cando eramos novos o verán era o verán e o inverno era o inverno. Chovía polo San Froilán e non paraba ata o San Xosé. Agora esta a cousa tan revolta que xa non temos nada que facer", comenta un veciño.

E ante esta situación un xa non sabe que facer ca roupa, sacamos o traxe de baño ou a chaqueta?

"Non sabemos que poñer, eu hoxe veño abrigada e se quito a chaqueta teño frío pero o mércores xa ven a calor. Temos que ir coma o tempo", afirma outra veciña.

Así que, xa saben, para a próxima semana, traxe de baño, e para a seguinte, Deus dirá.