López Campos di estar disposto a "mover posicións" para un acordo sobre a lingua

O conselleiro de Cultura, Lingua e Xuventude, José López Campos, defendeu este xoves o novo Plan Xeral de Normalización da Lingua Galega como unha oportunidade "histórica" para impulsar o uso social do galego e mostrar aberto a "mover posicións" para un acordo sobre a lingua galega.

López Campos pediu de novo aos partidos políticos que manteñan a vía do "diálogo" para alcanzar un amplo consenso sobre o documento, alén de ofrecerse de novo a pactar sobre o decreto do plurilingüismo.

Tras entregar o texto á Real Academia Galega (RAG) en San Caetano, López Campos sostivo que a actualización do plan de 2004 responde a unha necesidade derivada dos cambios sociais e tecnolóxicos das dúas últimas décadas e ao descenso do número de falantes reflectido por distintos estudos socio-lingüísticos.

O titular de Cultura destacou que o proceso permitiu "despolitizar" o debate sobre a lingua e falar do galego "en positivo", tras abrir un amplo espazo de reflexión e participación, coa implicación de institucións, entidades sociais e culturais e representantes da sociedade galega.

Segundo explicou, o documento inclúe preto de 700 medidas que abarcan todos os ámbitos da vida social e parten da idea de que a protección do galego é unha "responsabilidade colectiva".

López Campos recoñeceu que o uso social do galego descendeu, especialmente entre a poboación máis nova e nas contornas urbanas, aínda que destacou que Galicia mantén un elevado nivel de competencia lingüística e unha valoración positiva da lingua por parte da sociedade.

Ao seu xuízo, ese contraste demostra que o problema non radica no coñecemento do idioma, senón no seu uso cotián, polo que o plan aposta por medidas "de estímulo e promoción".

O conselleiro volveu a lembrar que a actualización do Plan Xeral de Normalización é un documento que inicia agora o seu percorrido "político", por ou que espera que haxa "puntos de encontro" e que todas as formacións poidan "sumar" para construír "o futuro do galego de xeito conxunto".

"A lingua é de todos e todas as galegas e por tanto é responsabilidade de todos seguir impulsando medidas de estímulo que permitan que o noso maior tesouro póidase transmitir de xeración en xeración", expresou.

Entre os principais retos, sinalou os cambios sociais e demográficos, coa realidade migratoria como transfondo, o que fai que se requiran medidas de "acollida lingüística".

En canto ao principal escollo co BNG, o ámbito educativo, López Campos situouno como "unha parte do reto" e defendeu que é necesario actuar sobre os espazos de socialización, a formación profesional, a universidade, e os novos hábitos de consumo e comunicación.

O conselleiro situou as primeiras críticas do Bloque e da Mesa pola Normalización Lingüística como froito "do descoñecemento", xa que se trata dun documento "extenso" que non se pode analizar nunhas horas".

"Evidentemente hai posicionamentos diferentes, pero temos que atopar un punto de encontro. Creo que hai pasos importantes onde este documento acredita que estamos en condicións de movernos da nosa posición para intentar poder chegar a unha negociación", declarou.

Respecto ao decreto do plurilingüismo, asegurou que non será unha "liña vermella" na negociación e que o documento "abre a porta" para introducir "axustes" que permitan avanzar cara a máis equilibrio lingüístico.

Pola súa banda, o presidente do Real Academia Galega, Henrique Monteagudo expresou a necesidade de que o futuro Plan sirva para impulsar medidas "eficaces e efectivas" que contribúan a reverter a perda de falantes.

Durante o acto, o conselleiro de Cultura fíxolle entrega do plan, un xesto que agradeceu, aínda que non entrou a valorar o contido do documento porque non puido lelo aínda.

Si quixo insistir no diagnóstico sobre a lingua galega, que atravesa unha situación "delicada" debido á perda de falantes pola falta de transmisión interxeracional, os cambios de lingua, a presión do castelán nas contornas urbanas e o impacto dos novos medios de comunicación, especialmente entre a poboación infantil e xuvenil.

A iso sumou o "desacordo político importante" e unha polémica que, ao seu xuízo, "non beneficia ao idioma".

"Ante grandes males, grandes remedios", resumiu Monteagudo, quen lembrou que a propia Academia foi a impulsora dun pacto pola lingua que non debe limitarse "a cambiar o ton do debate público", senón traducirse en actuacións concretas desde as administracións para mellorar a situación do galego.

"Os plans son eficaces cando se implantan, cando se levan á realidade", expresou, á vez que desexou ao conselleiro "a maior das sortes" no percorrido político que queda por percorrer.