Licitado por 11,2 millóns o primeiro treito da conversión en autovía da estrada entre Brión e Noia

A finais deste ano está previsto que comecen as obras para a conversión en autovía da estrada entre Brión e Noia, tamén coñecida como corredor. Nesta estrada circulan diariamente máis de 10.000 vehículos.

Esta conversión en autovía beneficiaría 160.000 persoas, sobre todo as que toman a vía con frecuencia para moverse dende localidades da ría de Muros ata Santiago. O tránsito polo corredor aumenta cada día máis neste tempo.

O primeiro treito que se desdobrará é o que vai de Brión e o enlace de Urdilde, en Rois. Algo menos de 5 km que presentan poucas dificultades técnicas porque xa conta co terreo para construír un cuarto carril.

A Xunta acaba de licitar as obras por algo máis de 11 millóns de euros.

"Ampliamos o prazo de presentación de ofertas ata o 12 de setembro para que o mes de agosto non pille por sorpresa os contratistas, e atendendo tamén a demanda do sector da construción de ampliar eses prazos, toda vez que se está licitando moita obra pública", dixo a conselleira de Vivenda e Planificación de Infraestruturas, María Martínez Allegue.

Segundo os prazos marcados, as obras comezarían este ano e rematarían en 2027.

A conversión en autovía busca tamén reducir a sinistralidade nesta vía, na que nos últimos anos se levan rexistrado accidentes importantes.