A Audiencia de Ourense absolve os dous acusados de orixinar un incendio nas termas da Chavasqueira
O tribunal entende que non resultou acreditado que os acusados tivesen participación na orixe do incendio
A Sala incide en que a proba practicada non desvirtuou o dereito fundamental da presunción de inocencia dos procesados
A sección segunda da Audiencia Provincial de Ourense absolveu os dous acusados de incendiar as termas da Chavasqueira durante a madrugada do 24 de abril de 2019. Tal e como se recolle nun comunicado, o tribunal entende que non resultou acreditado que os acusados, un antigo empregado da empresa e o seu amigo, tivesen participación na orixe do incendio, tal e como sostivo a acusación particular, exercida polo Concello de Ourense.
O Ministerio Fiscal, pola súa banda, non formulou acusación, ao considerar que non se xustificou debidamente a participación de ambos nos feitos. A Sala incide en que a proba practicada non desvirtuou o dereito fundamental da presunción de inocencia dos procesados, "posto que as meras sospeitas ou conxecturas concorrentes son insuficientes".
A sentenza non é firme, pois cabe presentar recurso ante o Tribunal Superior de Xustiza de Galicia.
