Levan de madrugada bebidas valoradas en 15.000 euros dun almacén de Cerceda
Roubaron tamén unha das furgonetas de reparto e causaron estragos nas instalacións
A Garda Civil de Ordes investiga o suceso rexistrado o sábado no lugar da Silva
A madrugada deste sábado foi moi activa na Silva. Sobre as tres da mañá, os ladróns entraron nunha nave de distribución de bebidas deste lugar de Cerceda. Cortaron axiña a luz e a conexión a internet para inutilizar o sistema de alarma. Arramplaron cos viños máis cotizados que estaban nun expositor e no almacén centráronse na zona das bebidas alcólicas de alta gradación.
Os donos da empresa valoran a mercadoría dustraída nuns 15.000 euros. Pero a iso hai que sumarlle alomenos outro tanto para repoñer o que estragaron ao tentar mover o material cunha carretilla de palés. No percorrido danaron unha das estanterías de gran altura e un camión estacionado na saída.
A maiores, a mercadoría levarona nunha das furgonetas da empresa, unha Volswagen Crafter branca sen rotular que polo de agora segue sen aparecer. Malia a todo o trafego que tiveron que facer os ladróns, os que viven arredor da nave non se percataron do que estaba acontecendo de madrugada. A Garda Civil de Ordes está a cargo da investigación e agárdase que as gravacións das cámaras de seguridade axuden a dar cos autores do roubo.
O sistema de alarma xa está de novo operativo, pero o que vai custar máis é recuperar a actividade habitual da empresa, porque, ao ser o luns festivo, aínda non puideron verificar ata que punto está danada a rede informatica e os sistemas de xestión. E tamén contan xa con que terán que alugar vehículos de reparto, porque amáis da furgoneta que levaron, os ladróns estraviaron as chaves do resto dos vehículos da empresa.
