Aemet amplía a vaga de calor ata o vindeiro mércores
Leiro marcou este xoves a temperatura máxima de Galicia, con 41,3 graos
Un día máis Ourense volveu ser a provincia galega máis afectada pola calor con numerosas localidades por riba dos 40 graos.
A temperatura máxima rexistrouse en Leiro, na estación EVEGA, ás seis menos dez da tarde deste xoves. Foi de 41,3 graos.
Ourense cidade chegou aos 41,2 graos. Vilamartín de Valdeorras subiu o termómetro ata os 40,5 na estación da Portela e en Rubiá padeceron 40,3 graos.
Tamén en Lugo tiveron hoxe unha xornada de calor abafante. A temperatura máxima da provincia foron os 40,2 graos rexistrados na estación da Míllara, en Pantón, ás cinco e vinte da tarde.
As provincias da Coruña e Pontevedra foron as máis afortunadas nesta xornada. Lalín chegou aos 30,9 graos, pero na costa roldaron os vinte. E na provincia da Coruña, a máxima marcouna Melide con 31,8 graos.
A vaga de calor amplíase ata o mércores
Precisamente este xoves, a Axencia Estatal de Meteoroloxía volve ampliar a duración da vaga de calor.
As temperaturas seguirán sendo extremas, polo menos, ata o mércores que vén.
.png)
