Laporta, imputado por unha posible estafa de 91.500 euros a un investidor en 2016

O Xulgado de Instrución número 22 de Barcelona citou a declarar como investigados, o próximo 16 de xaneiro, o presidente do F. C. Barcelona, Joan Laporta; o vicepresidente Rafael Yuste e os exdirectivos da entidade Xavier Salga i Martín e Joan Oliver por un presunto delito de estafa de 91.500 euros a unha persoa investidora en 2016.

O auto admitiu a trámite a querela contra Laporta, Yuste, Salga i Martín e Oliver, todos eles vinculados ás sociedades Core Store, radicada en España, e CSSB Limited, con sede en Hong Kong, no momento no que se produciron os feitos.

A querelante investiu, a mediados de 2016, a través dun axente de banca privada, 50.000 euros en concepto de préstamo e cun 6 % de xuros, en Core Store, que tiña un plan estratéxico para promover o ascenso do Reus Deportivo de Segunda División B a Segunda División.

A muller desembolsou tamén outros 54.000 euros en accións de CSSB Limited, cuxo obxecto era a creación na China dunha academia de formación inspirada na Masia do F. C. Barcelona.

Ademais de ter, a priori, unha moi boa rendibilidade, o principal atractivo de ambos os proxectos residía "na reputación pública e profesional dos intervenientes", pois tratábase de "figuras amplamente recoñecidas e reputadas no ámbito deportivo e empresarial", sinala a querela.

Laporta figuraba entón como administrador solidario de Core Store xunto a Oliver, exdirector xeral durante o seu primeiro mandato como presidente da entidade blaugrana, conselleiro delegado do Reus Deportiu ata a súa desaparición e representante legal de CSSB Limited.

Dos 104.000 euros investidos, a persoa afectada só logrou recuperar 12.500 euros, en agosto de 2024, tras diversas reclamacións polos reiterados incumprimentos contractuais de ambas as sociedades.

Tras coñecer a través do documental 'Laportagate-O caso do Reus 2' que outras persoas acometeran investimentos errados similares ás súas en Core Store e CSSB Limited, decidiu contactar co avogado Pepe Oriola, que representa máis afectados, para emprender accións legais.

Esta é a terceira causa aberta en que se investiga a Joan Laporta por presunta estafa pola súa vinculación coas sociedades Core Store e CSSB Limited.