Jennifer López toma o sol na Toxa antes do seu concerto en Pontevedra
A artista inicia este martes a súa xira española 'Up All Night' no Parque de Tafisa
Publicou fotos en bikini e un vídeo gozando da paisaxe galega
A cantante e actriz estadounidense Jennifer Lopez aproveitou este luns para descansar e tomar o sol na illa da Toxa, no Grove, antes do concerto que ofrecerá este martes en Pontevedra. A artista publicou varias fotos na súa conta de Instagram nas que aparece en bikini, cunha camisa branca atada á cintura e lentes de sol, xunto á piscina do hotel onde se hospeda.
“¡Hola España! Nos vemos pronto”, escribiu López en español, acompañando o texto cunha emoticona da bandeira española. Tamén compartiu un vídeo no que se ve viaxando en coche e observando a paisaxe galega desde a ventá.
Un arranque espectacular en Pontevedra
Jennifer Lopez abrirá este martes en Pontevedra a súa xira española Up All Night, cun concerto no Parque de Tafisa que comezará ás 22:00 horas. O espectáculo durará hora e media e non contará con artistas abreconcertos.
Sobre o escenario, de 16 metros de alto e case 30 de ancho, a artista estará acompañada do seu corpo de baile e dun completo dispositivo escénico con pantallas e iluminacións. Aos seus 55 anos, López continúa combinando as súas facetas de cantante, actriz, bailarina e empresaria.
Sete concertos en España e xira internacional
Despois de Pontevedra, a artista actuará en Cádiz (10 de xullo), Fuengirola (11), Madrid (13), Barcelona (15), Bilbao (16) e Tenerife (18). A continuación, levará a súa xira por cidades de Hungría, Italia, Turquía, Polonia, Romanía, Emiratos Árabes Unidos, Exipto, Kazaxistán, Uzbekistán e Armenia.
