Investigan un octoxenario por un incendio en Chandrexa de Queixa que queimou 18,5 hectáreas este luns
Investigan un octoxenario por un incendio en Chandrexa de Queixa que queimou 18,5 hectáreas este luns
O SEPRONA sospeita que o incendio se produciu debido a unha queima non autorizada na leira do investigado
O Servizo de Protección da Natureza (SEPRONA) da Garda Civil de Pobra de Trives tomou declaración en calidade de investigado a un home octoxenario como presunto autor dun delito de incendio forestal por imprudencia.
O lume declarouse o pasado luns, 8 de setembro, en Casteloais, no municipio de Chandrexa de Queixa, un dos máis afectados polos incendios este verán, e quedaron queimadas 18,5 hectáreas de monte raso e arboredo.
A investigación do SEPRONA puido determinar que o incendio se produciu debido a unha queima non autorizada na leira do investigado. Para a extinción das chamas mobilizáronse 4 helicópteros, 4 avionetas, 3 motobombas, 10 brigadas e efectivos da Garda Civil, segundo informou a Comandancia de Ourense.
