Investigado un veciño de Sanxenxo por dous delitos de roubo e outro de ocupación ilegal

A Garda Civil de Sanxenxo, en colaboración coa Policía Local, informou de que se investiga un home de 40 anos, veciño da localidade e con antecedentes penais, como presunto autor de dous delitos de roubo en establecementos de hostalería e de lecer náutico, un contra a saúde pública e outro de usurpación dun inmoble en Portonovo.

Segundo relata a Garda Civil nun comunicado, os feitos ocorreron na mañá do pasado día 13 de xaneiro, cando accederon ao inmoble que viña ocupando ilegalmente en Portonovo. Durante a actuación, localizáronse no interior da vivenda efectos procedentes de dous roubos que se estaban investigando, xunto con tres caixas de cartón, que contiñan no seu interior un total de 23 quilogramos de cánnabis que estaba listo para a venda. Esta mercadoría podería alcanzar no mercado os 45.000 euros.

Transcorridas 24 horas do desaloxo da vivenda anterior, recíbese unha nova alerta de que entrara de novo noutro inmoble, a escasos 500 metros do anterior, forzando a porta de entrada e aproveitando a ausencia do seu propietario que utiliza a súa vivenda en período vacacional, logrando que fose desaloxado de novo.

Os feitos investigados foron postos en coñecemento do Xulgado de Garda de Cambados, onde deberá comparecer o presunto autor dos feitos cando sexa citado.