Investigado un veciño de Pontevedra por supostamente roubar máis de 2.300 euros dunha empresa de Caldas

A Garda Civil investiga un veciño de Pontevedra, de 44 anos de idade, como suposto autor dun delito de furto, ao levar máis de 2.300 euros en efectivo dunha empresa de Caldas de Reis.

Segundo informa a Benemérita, os feitos ocorreron nunha empresa de fabricación de subministracións industriais o pasado 10 de febreiro. O autor, utilizando a técnica do descoido, aproveitaría a ausencia momentánea de empregados no despacho para localizar e subtraer o diñeiro en efectivo do que dispoñían nese momento na zona de administración da compañía.

Tras obter o botín, 2.345 euros, o individuo abandonou a planta de maneira "rápida e discreta", sen que os traballadores detectasen a súa presenza ata minutos despois. 

Foi grazas ás gravacións das cámaras de seguridade e aos testemuños dos presentes no momento dos feitos como se puido identificar o autor, que terá que comparecer ante a sección única Tribunal de Instancia número 1 de Caldas.