Interceptado en Crecente transportando persoas sen ter licenza

A Garda Civil interceptou un veciño da localidade pontevedresa de Crecente, de 43 anos, transportando no seu vehículo ilegalmente outra persoa, coa que pactara un prezo de 40 euros a pesar de carecer de licenza para ofrecer este servizo.

Os axentes, segundo informou este luns o Instituto Armado, tiveron coñecemento de que había unha persoa que se dedicaba habitualmente a realizar servizos de transporte de viaxantes sen ter título habilitante e realizando o mesmo no seu vehículo particular.

Tras unha investigación dos feitos os axentes procederon a interceptar o vehículo con condutor e acompañante na estrada EP-5005, termo municipal de Crecente, cando estaba a realizar un servizo, o cal fora contratado mediante chamada telefónica polo prezo de 40 euros.

Polos feitos descritos o condutor enfróntase a unha infracción moi grave, contemplada na Lei 4/2013, do 30 de maio, de transporte público de persoas en vehículos de turismo de Galicia, contemplando sancións de entre 2.000 e 6.000 euros.