Inés Rey rexeita sancionar ou restrinxir tráfico en zonas de baixas emisións na Coruña

A alcaldesa da Coruña, Inés Rey, asegurou que "non se vai sancionar, non se vai restrinxir e non se vai cambiar ningunha ordenanza" nas Zonas de Baixas Emisións (ZBE).

Despois de que o Goberno aprobase unha modificación do decreto que obriga a distinguir entre coches segundo o que contaminan e que os concellos conten cun réxime sancionador, Rey defendeu que "a multa non é a solución" á vez que lembrou que A Coruña "non é negacionista do cambio climático".

Salientou que na cidade "se implementaron zonas de baixas emisións hai tempo, como A Mariña ou a Cidade Vella, onde non se permite o paso de vehículos".

Na Coruña "non estamos nunha situación de risco", di Rey 

Rey informou, ademais, de que "a calidade do aire é boa" e, segundo os medidores, "non estamos nunha situación de risco".

"O que non imos facer é sacrificar a calidade de vida dos cidadáns a favor da calidade do aire. Iso non é unha transición xusta", expuxo, e insistiu en que non lle vai dicir a "ningún traballador ou autónomo que ten que cambiar o seu coche e comprarse un eléctrico".

A rexedora asegurou que está "a tope coa loita contra o cambio climático, pero isto non vai implicar que se sancione, se restrinxa ou se faga unha cidade a dúas velocidades para aqueles que si poden afrontar o cambio do seu vehículo fronte a la gran maioría social que non o pode facer".

"En ningún caso vai sancionar", repetiu Rey, que revelou que xa trasladou a súa posición ao Ministerio para a Transición Ecolóxica.