Indra reforzará o seu centro tecnolóxico en Vigo para especializalo en guerra electrónica

O conselleiro delegado de Indra, José Vicente de los Mozos, asegurou que a compañía investirá nos próximos dous anos 100 millóns de euros nas súas instalacións de Vigo, Xixón e Córdoba, ao que se sumarán outros 43 millóns de euros para unha nova fábrica en Kansas dedicada ás súas divisións de negocio de tráfico aéreo e mobilidade.

En relación cos investimentos en España, o directivo destacou que o plan en Vigo é reforzar o centro tecnolóxico da compañía para especializalo en guerra electrónica, en sistemas contra drons, en deseño de hardware, en microelectrónica e en sistemas de mando e control, entre outras cuestións.

A empresa está a traballar no lanzamento da súa primeira liña automatizada de radares en Córdoba, que contará cunha capacidade anual de produción de ao redor de 100 radares Nemus, o cal aspira a converterse "no futuro sistema antiaéreo español e europeo".

En canto ás súas instalacións en Xixón, adiantou que a intención da empresa é realizar as primeiras operacións para a produción dos vehículos 8x8 Dragón antes de que acabe o ano. 

Na nova planta dos Estados Unidos, a súa actividade acompañará a división de Tráfico Aéreo na fabricación de radares e radios para o mercado americano, así como na construción de pórticos de peaxe tipo free flow para a área de mobilidade.

En relación coa posible venda de activos de Minsait, a filial tecnolóxica da compañía e que entre xaneiro e setembro deste ano representou case o 62% dos ingresos da empresa, o conselleiro delegado de Indra recalcou que tanto el como o presidente da firma, Ángel Escribano, teñen claro que activos non son estratéxicos.