Inditex gaña a cifra récord de 1.375 millóns no primeiro trimestre fiscal, un 5,4 % máis

O grupo Inditex obtivo un beneficio neto de 1.375 millóns de euros no seu primeiro trimestre fiscal (febreiro a abril), un 5,4 % máis en comparanza co mesmo período de 2025, segundo o que comunicou este mércores ao regulador bolsista (CNMV).

O grupo téxtil, que engloba marcas como Zara, Pull&Bear ou Massimo Dutti, experimentou no período analizado unha repunta interanual das vendas do 5,8 %, ata 8.750 millóns, que a tipo de cambio constante se elevaron ata o 8,8 %, e o resultado operativo (EBITDA) creceu un 7,3 %, ata os 2.568 millóns.

A maior empresa cotizada española adiantou unha alza nas vendas en tenda e en liña no que vai do seu seguinte trimestre fiscal, entre o 1 de maio e o 1 de xuño, do 11,5 % en taxa interanual e a tipo de cambio constante.

Goirigolzarri, ex de Caixabank, novo conselleiro

O Consello de Administración de Inditex propoñerá o nomeamento de José Ignacio Goirigolzarri, expresidente de Caixabank, como conselleiro independente, na xunta de accionistas prevista para o próximo 7 de xullo.

Goirigolzarri substituirá así a Rodrigo Echenique, quen deixa o Consello por expirar o seu mandato, segundo anunciou o grupo téxtil galego, cuxo Consello de Administración tamén propoñerá á xunta a aprobación dun dividendo de 1,75 euros por acción con cargo aos resultados do 2025, composto por un dividendo ordinario de 1,20 euros e un dividendo extraordinario de 0,55 euros por acción.

O dividendo componse de dous pagos iguais de 0,875 euros por acción: o primeiro abonouse o 4 de maio de 2026 e o segundo realizarase o 2 de novembro de 2026 (0,325 euros ordinario máis 0,550 euros extraordinario).

Sobre o crecemento do grupo, a compañía destaca no seu informe que se sustenta no investimento continuo na súa rede de tendas, nos avances realizados na canle de vendas en liña e nas melloras nas plataformas loxísticas. Innovación, tecnoloxía e intelixencia artificial están presentes en toda a súa estratexia, engade a compañía téxtil.

Inditex reafirmouse no crecemento xa anunciado do espazo bruto anual neste 2026 de ao redor do 5 %, ao que acompaña unha contribución do espazo á venda nese período e unha forte venda en liña. Así mesmo, para o crecemento a longo prazo, Inditex executa investimentos ordinarios de ao redor de 2.300 millóns, que se dedicarán, principalmente, á optimización do espazo comercial, a integración tecnolóxica e a mellora das plataformas en liña.