Os xabarís adéntranse na zona urbana no concello de Boiro

En Boiro, en concreto no Saltiño, a presenza de xabarís dá moito que falar entre a veciñanza. Nun vídeo cedido vese como catro exemplares irrompen a todo correr na estrada principal que atravesa este lugar da parroquia de Abanqueiro.

E fano sen agardar a chegada da noite. Din alí que teñen visto onda as casas ata nove animais xuntos.

A pegada de que fozan nas leiras está borrada polos traballos de preparación dos terreos para botar o millo e poñer en marcha outros cultivos. Un traballo que fan coa esperanza de que os porcos bravos non entren a estragalo, aínda que a repetida imaxe da súa presenza supón unha ameaza grande.