Declarado un incendio nun edificio ocupado da Coruña pendente de desaloxo
Os bombeiros tiveron que apagar as lapas en dous puntos diferentes, aínda que non houbo danos persoais
O edificio afectado ten unha orde de desaloxo por ocupación ilegal
Un incendio, nun edificio da Coruña ocupado ilegalmente, obrigou a despregar un amplo dispositivo de emerxencia, aínda que non hai que lamentar danos persoais.
Sobre as once desta noite, os bombeiros da Coruña recibían o aviso da presenza de lapas no segundo andar dun inmoble da avenida de Oza. Eran dous focos en dous cuartos que obrigaron a brigada a actuar rapidamente para evitar que se espallase ao resto do edificio.
Tras ventilaren o fume e comprobar que non había ningunha persoa afectada, media hora despois daban por concluída a intervención. O operativo obrigou a cortar parte da avenida, que mantivo o tráfico por un só carril.
Estase a investigar se o lume foi intencionado, xa que as lapas apareceron en dous lugares diferentes e sobre o edificio hai pendente unha orde de desaloxo por ocupación ilegal prevista para finais deste mes.
