Co atraso no ensilado da herba e na sementeira do millo, prevense perdas millonarias

Toda esta herba debería estar xa cortada, pero de novo o exceso de chuvia está a atrasar a campaña de ensilado. É máis, os produtores quéixanse de que este ano están a ter aínda máis perdas que o pasado.

"Bastante peor, porque o ano pasado tiñamos unha campaña de herba que nos deu unha despensa da que se está tirando agora, pero este ano hai moitísima menos pradeira feita, con moita menos herba para forraxe", sinala Antonio Balado, produtor de millo e vendedor de sementes. 

Ao mesmo tempo, a demora no ensilado e mais o frío á súa vez están a atrasar a sementeira do millo, ao igual que acontecera na campaña anterior. Daquela, os gandeiros tamén tiveran que recorrer a ciclos máis curtos e menos produtivos, co conseguinte gasto na compra de forraxe.

"Canto máis tarde deamos sacado a herba, máis tarde damos metido o millo. O problema é que despois nos vai pasar coma o ano pasado, que nos metemos no outono, empeza a chover e non se dan recollido as parcelas", engade Balado. 

De non mellorar o tempo, agárdanse, por tanto, unhas perdas millonarias nun sector que sementa cada ano unhas 75.000 hectáreas de millo.