Incendio sen feridos nunha fábrica de madeira en Porto do Son

Un incendio orixinado este martes nunha madeireira de Porto do Son desprazou dúas dotacións de bombeiros, o GES de Noia, a Garda Civil e a Policía Local.

O lume orixinouse na tubaxe de aspiración do serradoiro e inmediatamente se propagou ata o outro lado da fábrica nunha moega de serraduras. Por sorte, e aínda que practicamente todo o cadro de persoal estaba traballando nese momento, non quedou ninguén ferido. Á espera de facer avaliación total dos danos na empresa celebran que non fora máis grave. 

Contra o mediodía os bombeiros conseguiron finalmente baleirar de serraduras a moega e controlar por completo o lume.