Incendio na fábrica abandonada de Porcelanas Santa Clara, no barrio vigués de Cabral

Unha intensa fumareda negra comezou a saír das ventás da vella fábrica de porcelana a iso das catro da tarde.

Os bombeiros tardaron máis de catro horas en apagar o lume. Os traballos de extinción, coas mangueiras despregadas no asfalto, alteraron o tráfico da avenida de Ramón Nieto.

A Policía Científica inspeccionaba o inmoble esta mañá na busca dalgunha pista que esclareza o sucedido. O edificio é unha ruína onde non consta que viva ninguén de xeito continuado.

Malia que non houbo feridos, os danos materiais poderían comprometer a estrutura do histórico edificio. Os veciños lamentan o estado en que está a que foi unha das fábricas máis prósperas de Vigo.

Agardan que a anunciada construción de máis de 900 vivendas e un parque cara ao río Lagares nesta parcela poña en valor o emblemático inmoble.