III Encontro Galego de Cultura Popular Serán03
As pandeireteiras serán as protagonistas deste festival folclórico
Hoxe en día é imposible entender a música galega sen a figura das pandeireteiras, e o Serán que regresa tras dous anos de pandemia congregará un milleiro de artistas e intérpretes arredor dun dos instrumentos fundamentais do noso folclore.
Nesta convocatoria toca reivindicar a pandeireta despois de que nas primeiras edicións levaran o protagonismo o baile tradicional e as bandas de música populares. O rexurdimento da pandeireta vén de lonxe, pero ultimamente da man das Tanxugueiras vive, quizais, o seu mellor momento
Pero o Serán é moito máis. O termo xa fai referencia ás festas e reunións dos veciños nas aldeas e vilas galegas, que se realizaban varios días á semana despois do traballo, servindo así de momento de lecer e de reunión social.
Este III Encontro da Cultura Popular Galega quere convidar todo o público a tres días de festa, para tocar e bailar, para reencontrarnos e mostrar a creatividade e a riqueza da nosa música e do noso baile.
