Igualdade pide que se investigue ao instrutor do exDAO por "trivializar" a violencia de xénero

O Ministerio de Igualdade presentou unha carta ante o Consello Xeral do Poder Xudicial (CXPX), na que pide que investigue ao maxistrado David Yehiel Maman Benchimol, xuíz que instrúe a causa pola denuncia interposta contra José Ángel González, ex director adxunto operativo (DAO) da Policía Nacional por agresión sexual contra unha subordinada, por unhas declaracións públicas que considera "incompatibles" coa "imparcialidade" xudicial.

A misiva, asinada pola delegada do Goberno contra a Violencia de Xénero, Carmen Martínez Perza, solicita a apertura de dilixencias informativas e, no seu caso, un expediente disciplinario por unha posible "falta grave".

"Realizou diversas manifestacións relativas ás mulleres vítimas de violencia de xénero, ao exercicio dos seus dereitos procesuais e á protección das persoas menores de idade, cuxo contido resulta manifestamente incompatible cos deberes de imparcialidade, respecto e suxeición ao ordenamento xurídico que rexen a función xurisdiccional", argumenta Igualdade.

As denuncias das mulleres "non teñen demasiado sentido", dixo o maxistrado

Os feitos remóntanse a febreiro de 2026, cando o maxistrado realizou diversas afirmacións durante un acto formativo no Ilustre Colexio da Avogacía de Madrid, posteriormente difundidas por La Sexta este mércores 22 de abril.

Segundo o escrito remitido ao CGPJ, o xuíz sostivo, entre outras cuestións, que as denuncias das mulleres "non teñen demasiado sentido" e responden a un suposta "caza da orde de protección", ademáis de cuestionar as vantaxes legais que, ao seu xuízo, teñen as mulleres para denunciar .

Tamén, segundo Igualdade, atribuíu ás nais comportamentos de "manipulación" sobre os seus fillos -o que describiu como "lavado de coco"- e afirmou que "a muller é unha inimiga acérrima" da custodia compartida.

As opinións do xuíz afectan á "percepción de imparcialidade" do CXPX, segundo Igualdade

Para o Ministerio de Igualdade, estas declaracións non son "opinións illadas", senón que reflicten "unha serie de prexuízos estruturais, estereotipos de xénero e posicionamentos ideolóxicos que afectan directamente á percepción de imparcialidade do órgano xudicial e comprometen a confianza pública na Administración de Xustiza, especialmente nun ámbito tan sensible como a violencia de xénero".

"Alimenta o conto das denuncias falsas", segundo o Goberno

Neste sentido, na carta defende unha "trivialización" da violencia de xénero e dos mecanismos de protección legalmente establecidos e argumenta que, por unha banda, o xuíz "suxire e alimenta o conto das denuncias falsas". Ademais, critica a "absoluta falta de perspectiva de xénero e a reprodución de estereotipos de xénero contrarios ao principio de igualdade" do xuíz.

"A ausencia de perspectiva de xénero evidénciase en que o maxistrado analiza a violencia e as relacións familiares desde prexuízos e xeneralizacións, en lugar de aplicar o marco xurídico vixente que esixe ter en conta a desigualdade estrutural e a específica situación das mulleres e dos menores como vítimas", apunta Igualdade no texto.

Do mesmo xeito, di que o xuíz recorre implicitamente a teorías "sen aval científico" como a chamada "síndrome de alienación parental".

O documento destaca ademais que o maxistrado non recoñece aos menores como vítimas directas da violencia de xénero, en contradición coa lexislación vixente, que inclúe tamén a chamada violencia vicaria.

"Deslexitima a identidade de xénero das persoas trans", engade a carta 

Do mesmo xeito, Igualdade alerta de que o maxistrado "está a negar ou deslexitimando a identidade de xénero das persoas trans" ao referirse a elas como "un home con aparencia de muller" e "priorizar unicamente o sexo asignado ao nacer ou o dato rexistral do DNI".

"Ese tipo de linguaxe reduce á persoa a unha categoría biolóxica e descoñece a súa identidade vivida, o que constitúe unha falta de respecto e recoñecemento cara ás persoas trans. Ademais, implica que a súa identidade é algo 'aparente' ou non válido, unha idea que está na base de actitudes discriminatorias", subliña.