O xuíz do caso Leire Díez cita como investigado o avogado de Cerdán
O maxistrado Santiago Pedraz atribúelle presuntos delitos de revelación de segredos, suborno e contra as institucións do Estado
O avogado Javier Teijelo en novembro de 2025 saíndo da prisión de Soto del Real onde estaba Santos Cerdán en prisión preventiva (Europa Press-A. Pérez Meca)
O xuíz da Audiencia Nacional Santiago Pedraz citou o 25 de xuño como investigado o avogado Jacobo Teijelo, que representa ao exdirixente socialista Santos Cerdán, na causa sobre unha presunta trama para desestabilizar operacións policiais e xudiciais que afecten ao PSOE ou ao Goberno.
O maxistrado, que acorda a citación nunha providencia coñecida este venres, investiga a Teijelo por presuntos delitos de revelación de segredos, suborno e contra as institucións do Estado.
Teijelo é o avogado que contratou Cerdán tras a súa imputación no denominado caso Koldo, e o seu despacho interveu en procedementos de gran complexidade vinculados a delitos económicos e de corrupción, incluída a defensa do narcotraficante José Ramón Prado Bugallo, Sito Miñanco.
Polo momento o maxistrado non o integra na presunta organización para desbaratar causas xudiciais contra o PSOE ou o Goberno, pero cre que coadxuvou aos intereses da trama, que foi designado como "responsable" das actividades da área de "hidrocarburos" e que presuntamente recibiu polo menos 125.000 euros provenientes do PSOE.
No sumario do caso aparecen numerosas conversacións entre Teijelo e Leire Díez, moitas delas falando de causas xudiciais.
Ademais, este avogado foi quen, xunto á exmilitante, se reuniu en marzo e en abril de 2025 con quen era man dereita do ex fiscal xeral do Estado Álvaro García Ortiz, o entón tenente fiscal da Secretaría Técnica, Diego Villafañe.
A Fiscalía Xeral do Estado informou o xuíz Pedraz de dúas reunións, unha o 6 de marzo de 2025, e outra entre finais de marzo e principios de abril, nas que Leire Díez foi presentada, segundo o Ministerio Público, como unha "compañeira de despacho", tivo "unha intervención menor" e sóubose da súa identidade posteriormente polos medios de comunicación.
Segundo a Fiscalía, sobre estes encontros informouse "a posteriori" ao entón fiscal xeral e nin Villafañe nin a fiscal Belén López, que estivo nunha das reunións, recibiron "indicación algunha" de Álvaro García Ortiz.
Amais de Teijelo, nesta causa están investigados outros dous avogados que exerceron a defensa no caso Koldo: Ismael Oliver, que representou o exasesor ministerial Koldo García, e Leticia de la Hoz, que lle colleu o testemuño e é a que actualmente o defende.
O xuíz Pedraz tamén investiga neste procedemento a Santos Cerdán, a quen outorga un "rol superior" na suposta trama, a Leire Díez, que coordinaría as actividades, e ao exvicepresidente andaluz e exdirixente socialista Gaspar Zarrías, que serviría como "vehículo" para aboar a Díez con cargo a fondos do PSOE.
A citación de Teijelo dará inicio á vintena de declaracións programadas polo xuíz os últimos días de xuño e a primeira quincena de xullo, entre as que tamén figura a presidenta do PSOE, Cristina Narbona, como testemuña.
