Detido un home en Pontevedra como presunto autor dun delito de violencia de xénero
Unha muller chamou á central de emerxencias do 112 para alertar de que fora agredida pola súa parella e que sangraba pola cara
A Policía Local de Pontevedra detivo un home como presunto autor dun delito de violencia de xénero, tras agredir á súa parella na rúa.
Segundo información do Concello, os feitos sucederon sobre as 05.00 horas do pasado 16 de maio e foi o servizo de emerxencias 112 o que deu a voz de alarma.
Unha muller chamou á central de emerxencias para alertar de que fora agredida pola súa parella e que sangraba pola cara. Ademais, durante a chamada, o operador escoitou a un home gritando de fondo.
Unha vez no lugar, os axentes atoparon á parella discutindo e comprobaron que a muller tiña feridas na cara. A vítima explicou que a súa parella a insultou, agarrouna da cabeza e magooulle a cara contra un portal.
Os axentes da policía local procederon a deter o home como presunto autor dun delito de violencia de xénero.
