Iberdrola amplía capital en 5.000 millóns para medrar nos EUA e no Reino Unido
A eléctrica incrementa ao máximo o investimento en redes en ambos os países aproveitando os novos regulamentos
A compañía rexistrou un beneficio neto no primeiro semestre de 3.562 millóns de euros, un 14 % menos ca o ano anterior
Iberdrola acordou lanzar unha ampliación de capital acelerada por un importe de 5.000 millóns de euros para acometer novas oportunidades de investimento en redes eléctricas dos Estados Unidos e do Reino Unido, grazas aos novos marcos tarifarios.
A compañía, presidida por Ignacio Sánchez Galán, levará a cabo unha colocación acelerada das accións novas, dirixida exclusivamente a investidores cualificados, para determinar, mediante un proceso de prospección da demanda, o tipo de emisión e o número definitivo de accións novas que se van emitir.
Nas últimas semanas, publicáronse os marcos tarifarios en Nova York e Maine, nos EUA, xunto co regulamento RIIO-T3 para o transporte de electricidade e a evolución dos marcos ED2 e ED3 no Reino Unido.
Este novo marco supón, segundo a compañía, unha oportunidade de investimento sen precedentes no negocio de redes, cifrada en 55.000 millóns de euros no ámbito global no período 2026-2031, un 75 % máis ca o sexenio anterior e unha rendibilidade estimada sobre fondos propios media dun 9,5 % en termos netos.
Resultados do primeiro semestre
Iberdrola obtivo un beneficio neto de 3.562,2 millóns de euros no primeiro semestre do ano, que representa unha caída do 13,8 % con respecto ao mesmo período do exercicio anterior, cando rexistrou plusvalías millonarias pola venda de activos en México, informou a compañía.
Ignacio Sánchez Galán, presidente executivo de Iberdrola. Alberto Ortega / Europa Press
O resultado bruto de explotación (EBITDA) da enerxética alcanzou os 8.286,9 millóns de euros a peche de xuño, un 13,8 % menos, mentres que a cifra de vendas no semestre ascendeu a 22.637 millóns de euros, practicamente en liña co ano anterior.
Excluíndo as plusvalías polo desinvestimento de activos do ano pasado, o beneficio neto de Iberdrola medraría un 20 % e a EBITDA un 5 %.
Con estes resultados en xuño, o grupo reiterou as súas perspectivas para o conxunto do exercicio, cunha previsión dun aumento de dous díxitos no beneficio neto, tendo en conta o recoñecemento de custos pasados nos Estados Unidos, xa rexistrado.
.png)