Hotusa compra o poboado do encoro de Belesar para rehabilitar vivendas para o seu persoal en Chantada
Hotusa compra o poboado do encoro de Belesar para rehabilitar vivendas para o seu persoal en Chantada
A operación busca facilitar o crecemento da sede local, con máis de 270 traballadores
A compañía aposta por reforzar o vínculo co territorio e dinamizar a zona
O Grupo Hotusa adquiriu o antigo poboado do encoro de Belesar, coñecido como ‘poboado Fenosa’, co obxectivo de rehabilitar as vivendas e destinalas ao persoal da súa oficina de Chantada. Segundo explicou nun comunicado, a operación responde á vontade de “facilitar o crecemento do proxecto de Chantada, onde xa traballan máis de 270 persoas, e seguir apostando por ese sólido proxecto”.
A compañía subliña que a rehabilitación permitirá dar resposta ás necesidades de aloxamento do seu persoal e, ao mesmo tempo, contribuír a dinamizar a zona, reforzar o vínculo da empresa co territorio e garantir a sostibilidade da súa expansión en Galicia.
Un proxecto consolidado en Chantada
Grupo Hotusa xestiona actualmente 25 hoteis en Galicia e conta con cinco oficinas corporativas en Chantada, Lugo, Monforte de Lemos, A Coruña e Vigo.
A sede chantadina naceu en novembro de 2012, nun dos proxectos máis ambiciosos da compañía, apostando polo potencial da localidade e da súa xente nova.
No décimo aniversario presentouse o documental Chantada, historia de un proyecto empresarial de Grupo Hotusa.
A empresa reivindica ademais o seu papel pioneiro na descentralización dos centros de traballo das grandes cidades e na incorporación de dinámicas de teletraballo.
Desde 2014, o grupo colabora con diferentes centros educativos de FP Dual en Galicia, formando máis de 800 alumnos, dos cales arredor do 50 % foron posteriormente contratados.
No curso 2023-2024 asinou convenios con 12 centros que ofrecen FP Dual, beneficiando 141 estudantes con prácticas remuneradas e cun investimento de 555.000 euros.
