Homenaxean unha veciña da Bola, pioneira ao volante
Homenaxean unha veciña da Bola, pioneira ao volante
Foi unha das primeiras mulleres en quitar o carné de conducir en Ourense e converteuse en todo un referente na comarca de Celanova, onde lles fixo de taxista, de balde, aos veciños da zona
Julia Vázquez Álvarez, de 82 anos, é a protagonista do mes na campaña pola Igualdade da Deputación de Ourense
Sesenta e catro anos leva Julia vivindo nas Mamoelas, moi pretiño do alto do Furriolo. Foi para alí ao casar e alí quedou cando o seu home emigrou a Suíza. "Fíxenme cargo do meu sogro, da tía, dos nenos, do traballo... E que ía facer?", explica.
Soa, nunha aldea illada e ao cargo dunha recua, non lle quedou outra que quitar o carné de conducir.
"Deume moita liberdade, moita vida. Ía a Celanova e levaba os velliños todos que había na estrada, ata sete persoas, mentres cabían...", explica Julia.
Ela é a referente deste mes nunha campaña da Deputación de Ourense pola Igualdade. Só hai que escoitar as súas historias.
"Dábame vergoña, porque era a única muller na autoescola. Os outros condutores tratábanme mal. Dicían: 'Ala, aí vai unha muller!', pero eu non quedaba atrás, eu pisáballe. O meu home e meu irmán puxéronme un taco debaixo do acelerador para que non puidese pisar, pero díxenlles: 'Se non o quitades, eu non subo máis no coche. E quitárono", conta entre risas.
Hoxe fixo unha excepción, pero hai sete anos que non conduce por problemas de saúde.
"Agora vou de paquete sempre, pero ás veces aínda freo!", ri.
